Community News, Views & Information

Our ain fire-end.
AIR—”Kelvin Grove,”

When the frost is on the grun’,
   Keep your ain fire-end,
For the warmth o’ summer’s sun
   Has our ain fire-end;
When there’s dubs ye might be lair’d in,
   Or snaw wreaths ye could be smoor’d in,
The best flower in the garden
   Is our ain fire-end.

You and father are sic twa!
   Roun’ our ain fire-end,
He mak’s rabbits on the wa’,
   At our ain fire-end.
Then sic fun as they are mumping,
When, to touch them ye gae stumping,
They’re set on your tap a-jumping,
   At our ain fire-end.

Sic a bustle as ye keep
   At our ain fire-end,
When ye on your whistle wheep,
   Round our ain fire-end;
Now, the dog maun get a saddle,
Then a cart’s made o’ the ladle,
To please ye as ye daidle
   Round our ain fire-end.

When your head’s lain on my lap,
   At our ain fire-end,
Taking childhood’s dreamless nap,
   At our ain fire-end;
Then frae lug to lug I kiss ye,
An’ wi’ heart o’erflowing bless ye,
And a’ that’s gude I wish ye,
   At our ain fire-end.

When ye’re far, far frae the blink
   O’ our ain fire-end,
Fu’ monie a time ye’ll think
   On our ain fire-end;
On a’ your gamesome ploys,
On your whistle and your toys,
And ye’ll think ye hear the noise
   O’ our ain fire-end.

May 22, 2016

Copyright © 1999- Dennistoun Online
All rights reserved | Admin