DennistounOnline
Community News, Views & Information


William Miller

The Queen o' Bonny Scotland's Mither like Mysel'.

There's walth o' themes in Scotland,
That ham'art tongue might sing
Wi' glee sae canty, that wad mak'
Its laneliest valleys ring;
But there is ane I dearly lo'e
In wimplin' sang to swell---
The Queen o' bonny Scotland's
A mither like mysel'.

Her wee bit rum'lin' roguie,
When rowin' on her knee,
Or cuddlin' in her bosie,
Will gladden heart an' e'e,
Wi' kissin' owre an' owre again,
His rosy cheeks will tell---
The Queen o' bonny Scotland's
A mither like mysel'.

She kens fu' weel how tenderly
A mither dauts her wean,
And a' the hinnied words that fa'
Atween them when alane.
Oh! if I were but near her,
O' breadless bairns to tell,
She'd listen, for our bonny Queen's
A mither like mysel'.

Then come to bonny Scotland,
There's no a neuk in't a',
Frae hill to haugh, that disna bear
Baith buirdly men and braw;
They'll welcome you to Scotland---
The thistle and blue-bell---
And ye'se be blessed by women-fock,
And mithers like yoursel'.

Jun 2, 2007

Copyright © 1999- Dennistoun Online
All rights reserved | Admin