If folk wad be cautious when takin' a drappy,
And mind they maun eat as weel's drink to be happy,
They'd be better acquaint wi' the grocer and dealer,
Nor be shouther-for-shouther wi' beagle or jailor:---
They micht blaw their ain whistle, and play a gude tune wi't,
If they had but the sense to tak' ane an' be dune wi't;
Ane an' be dune wi't, ane an' be dune wi't---
An' no to be daidlin' frae Tintock to Troon wi't,
An' wastin' their time,---but tak' ane an' be dune wi't.

A dram wi' an auld frien', I ne'er saw the harm in' t;
In gi'en an' takin', there's something sae warm in't,
Ane sits rather langer than maybe he should do,
An' spends somethin' mair than he otherwise would do---
The night has its pleasures, but morning this croon wi't---
Aye tak' my advice, just tak' ane an' be dune wi't;
Ane an' be dune wi't, ane an' be dune wi't---
An' dinna be sochrin' frae July to June wi't,
An' wastin' your time, but tak' ane an' be dune wi't.

A cheerie gudewife, wi' a smile where a frown was,
That helpit ye up, aye, in a ' your bit downfa's;
A cup o' gude tea, then, instead o' your drummock;
A groat in your pouch, for a gill in your stomach;
A guid coat on your back, and a pair o' new shoon wi't---
O these are the comforts o' ane an' be dune wi't---
Ane an' be dune wi't, ane an' be dune wi't;
For folk wha are tipplin' a hale winter's moon wi't
Are laughed at for fools,---so tak' ane an' be dune wi't.