William Miller

Tell her Mither.

When the wind is in the north,
Keep the house, says her mither;
When the wind is in the north,
Keep the house;
For the winds are over bauld,
And ye're sure to catch the cauld---
Ye'll be croighlin twa-fauld,
Says her mither, says her mither---
Ye'll be croighlin twa-fauld, says her mither.

When the wind is in the east,
Keep the house, says her mither;
When the wind is in the east,
Keep the house---
Gaun stravagin' in the dark,
By the dykeside or the park,
Is nae silly body's wark,
Says her mither, says her mither,
Is nae silly body's wark, says her mither.

But the lassie's heart's my ain,
Tell her mither, tell her mither;
But the lassie's heart's my ain,
Tell her mither;
And ae fauld o' Willie's arm,
Tho' it had nae ither charm,
Can keep a' within it warm---
Tell her mither, tell her mither,
Can keep a' within it warm, tell her mither.

Jun 2, 2007

Copyright © 1999- Dennistoun Online
All rights reserved | Admin